Aktivitäten

Anleitung zur Tourenanmeldung und zum Erfassen der Tourenberichte erfassen und Tourenfotos hochladen. PDF-Dokument

Wichtig: Adressänderungen bitte direkt im SAC Portal

Beschreibung zu den Tourenanforderungen

Pointe de Mourtri

Simone aus dem Oberwallis gebürtig, hat auf meinen Wunsch  den Bericht auf Wallissertütsch verfasst, viel Vergnügen beim Lesen und Raten. CA

Hochtür uf di Pointes de Mourti, 3564m mit dum SAC Angenstein am 9. und 10. Juli 2016

 Scho vor der Abreis hei wiär als Teilnähmer vam Christian Aeschlimann, dum Türuleiter, sehr detaillierti und üsserscht güet vorbereituti Informazione zer Hochtür bercho. Är isch mit der Ursi Ebner, schiner Partneri und ischer zweitu Türuleiteri güet zwei Wuche vorer die Tür ga rekognoszieru. Schie heint verzellt, äs heige de also nu fellig vil Schnee und mu sinke de teilwiis gäbig bis ze Oberschenkla i. Der Wätterbricht het im Vorüs e hüfu güets versprochu und alli heint ghofft, dass das öi so wird si.

Gitroffu hei wiär di Gruppa wa us Basl isch agreist erscht in Sidärs bi greschtum Sunnuschii, da wiär vorer nu iner Heimat si z'Bsüech gsi. Scho z'istigu ins Postauto isch e halbi Hochtür gsi. Leider sind d Reservazione nit bim Postauto-Chauffeur acho und somit hei wiär iisch mit e hüfu andre stähndu der Platz giteilt.  Wa wiär de bi dum Moiry Glacier si acho und di erschtu Idrick va der wunderschönu Natür hei gignossu, si wiär los gluffu in Richtig Cabane de Moiry, 2825m. Di Gruppa het schich so langsam agneechrut, z eint und z anner Gspräch isch z stand cho und mu het bald gmerkt dass e güeti Stimmig üfchunnt. Nach ungfähr 1 1/4 Stund hei wiär di Hitta erreicht und si düe nachera churzu Pause hinner der Hitta ga Iebige machu zer Spalturettig. Z Ursi und der Christian heint di Gruppa va 8 Liit üfgiteilt, so dass zwei chleineri Gruppe sind entstandu. Nach güet zwei Stund öschtriichische Fläschuzig machu, hei wiär glöibi alli fellig vil glehrt und äbu natirli öi glacht.

Zrug iner Hitta hei wiär nu chennu es Apéro gniässu, bevor dass de es wunderbars Hittuznacht het gigä. Scho währund dum Znachtässu und öi später wa wiär nu vorna am zellu si gsi minand, heind schich immer wieder Schteibeck rund um d Hitta üfghaltu. Wiär hei iisch gfrägt, ob ächt der Hittuwart dene eswas z'Ässu gäbe fer dass di schönu Tiäri da so flott chäme cho posieru fer di Turischtu... Iner Hitta hei wiär der Luxus kä, dass nur ischi Gruppa im Zimmer het gschlafu. Darmit isch nämli am Abu bald Rüeh ikehrt und am Morgu heint alli minand chennu üfstah.

Z'Früehtuck isch fer am 5.15 h agseit gsi und der Abmarsch fer am 6 h. Di Zite hei wer de öi chennu ihaltu. Wiär si aber nit d erschtu gsi wa los gluffu sind in Richtig Pointes de Mourti. Scho e Stund vor iisch isch e fellig grossi Gruppa los gangu. Di erschtu paar Meter si wiär de nu ohni Stiigiisu gluffu. Aber bald isch scho z Schneefäld cho und so hei wiär d Stiigiisu agleit. Nach es paar witere Meter si wiär de ufe Glacier de Moiry cho, wa wiär isch hei agseilut. D Ursi und der Christian heint schich da fer 4er Seilschafte entschidu. Nach es paar Gletscherspalte und wunderschöne Üssichte ze umliegundu Bärga und ins Tal si wiär de langsam ane Ischtig am Nord-Oscht-Grat cho. Da hei wiär churz e Pause gmacht und d Seilschafte, biziähigswiis d Seil so organisiert, dass wiär di liächti Gratchlätterii hei chennu startu. Der Christian het der Afang gmacht und d Ursi der Schluss. In denu viär Seilschafte si wiär der Grat embrüf gchlättrut, wobi zwischudurch zer Erholig immer mal wieder es Stuckji schneebideckte Grat isch derzwischu cho. Sogar z chrizgu mit entgäguchummunde Seilschafte isch keis Problem gsi. Miär het de aber glich z eint old z anner mal churz z Härz e chline Gump gmacht, wani rächts der Grat ab hä glüeget. Da is nämli scho biz z Loch ab gangu... Nach güet era Stund ufum Grat si wiär alli gsund und z fridu ufum Gipful acho und hei da mit schönschtum Wätter und era atembiröibundu Üssicht z Mittag gässu. Öi der Abstieg isch unproblematisch verluffu. Wiär hei nit ganz bis zum Ischtiig vam Grat zrug miessu, sondern hei vorer scho chennu üsstigu. Summi sind de das Schneefäld wa doch nu biz steil isch gsi embri grutscht, andri heint sus vorgizogu z löifu. Unnina acho hei wiär di Seilschafte wieder gheftut und si de fellig zügig in Richtig Cabane de Moiry zrug gluffu. Da acho hei wiär iisch es chalts Piärli gigönnt und afu mal d Schüeh biz la trechnu. Durch die güeti Planig und die unproblematisch Tür si wiär enz früeh zrug iner Hitta gsi und hei de nu biz chennu die schön Gletscherwält gniässu. So ze halbe 4 si wiär de vaner Hitta wieder emab gluffu, wa wiär e Äxtrabus hei kä, wa isch het abgholt und bis uf Vissoie het gibrungu. D Heimreis isch de va da a ehner biz lengi wordu. Basl isch halt eifach fascht e biz wiit wäg va de Bärga. Und glich heint schich öi da wieder ganz spannundi Gspräch ergä. Di ganz Gruppa het di schön Tür birichrut durch e güeti Stimmig und het schich doch rächt härzlich und dankbar chennu verabschiedu. An der Stell numal es grossus Merci an d Ursi und de Christian als Türuleiter, wa ihru Üfgab sehr professionell heint gmacht und iisch e Teil va ihrer Erfahrig heint mit ufe Wäg gigä!

Teilnehmer: Christian (TL); Ursi (TL); Jürg; Marcus; Philippe; Simone (Text); Mathias; Jan; Simon; Reynald